Níu ræðarar luku keppni í Bessastaðabikarnum sem haldinn var við ágætar aðstæður á laugardag. Ólafur B. Einarsson hafði betur gegn sínum skæðasta keppinauti, Haraldi Njálssyni og fékk Ólafur aftur afhentan Bessastaðabikarinn sem hann hafði látið í hendur mótstjóra um tveimur klukkustundum fyrr. Eftir mót var keppendum boðið í kaffi til forsetans, þ.e. Tryggva Tryggvasonar forseta kayakklúbbsins Sviða, og þeir sem ekki þurftu að drífa sig í útskriftarveislur nutu dýrindis kaffiveitinga. Ólafur hefur nú 280 stig eftir þrjár keppnir en Haraldur hefur 180 stig eftir tvær keppnir. Í þriðja sæti er Hilmar Erlingsson með 120 stig úr tveimur keppnum. Spennan á toppnum er mikil og ekki er síður hörð keppni um næstu sæti þar á eftir. Tvö mót eru eftir í sjókayakbaráttunni og greinilegt að allt getur gerst.
Sprettkeppnin á Norðfirði var æsispennandi og aðeins sjónarmunur á Ólafi B. Einarssyni og Þorsteini Sigurlaugssyni. Ólafur trónir nú einn á toppi kayakdeildarinnar með 180 stig en í 2. sæti er Haraldur Njálsson með 100 stig. Með sprettinum um helgina skaust Þorsteinn Sigurlaugsson upp í 3. sæti. Rétt er að minna á að aðeins tvö mót eru að baki og því hægur vandi að velta efstu mönnum úr sessi fyrir sumarlok. Næsta keppni á sjókayak er Bessastaðabikarinn 20. júní. Viku síðar, 27. júní, er komið að hinum geysisvala Tungufljótskappróðri hjá straumkayakmönnum. 
