Keppni verður haldin í sjókayakfærni laugardaginn 01.september 2012. Markmið keppninnar er tvíþætt: Að hafa gaman saman og auka við færni okkar. Stefnt er að því að halda keppnina við bryggjuna í Bryggjuhverfinu í Reykjavík (beðið er eftir endanlegu leyfi). Aðstæður til að fylgjast með keppninni þar eru mjög góðar og eru allir félagsmenn hvattir til að taka þátt og/eða koma og fylgjast með.
Keppt verður í braut þar sem ræðari þarf að fara í gegnum hindranir og leysa tækniþrautir. Flest viðfangsefni eru í samræmi við góða róðrartækni og færni á sjókayak ásamt nokkurra „busl“ æfinga. Heildarlengd brautar er um 400 m og verða reitir afmarkaðir með baujum.
Brautin er róin á tíma og er hönnuð þannig að færni ræðara vegur meira en hraði á beinni leið. Þá er brautin höfð þannig að venjulegur sjókayak hefur betri möguleika en hraður keppnisbátur eða grænlenskur veltubátur. Í sumum þrautum þarf þáttakandi að vera í sjónum og verður fatnaður að taka mið að því, þáttakendur verða að vera í björgunarvesti.
Keppnin er ætluð ræðurum á mismunandi getustigum og er skipt í tvo flokka (i) Almennur flokkur (ii) Úrvalsflokkur. Þáttakendur geta valið sér keppnisflokk en þeir sem hafa tekið 4* BCU þjálfun ber að fara í Úrvalsflokk.
Hver þáttakandi fær að fara tvær umfrerðir í brautinni. Efstu menn (3) í hvorum flokki sem hafa samanlagt besta tímann keppa síðan til úrslita. Áætlað er að það taki um 10-20 mínútur að fara brautina og keppendur verða ræstir með nokkurra mínútna millibili þannig að mest verða 3-4 þáttakendur samtímis í brautinni.
Dæmi um þrautir sem verða í brautinni eru:
- · Svig áfram og afturábak
- · Svig þar sem ár er róið á annarri hlið (*)
- · Róa til hliðar, þvert á bátsstefnu
- · Snúa bát í hring (360°)
- · Synda með bát
- · Róa með höndum
- · Róa sitjandi á skut (*)
- · Velta til hægri og vinstri (*)
- · Sjálfbjörgun úr sjó, valfrjáls aðferð
- · Standa upp í bát (*)
Ekki er gerð krafa til þess að þáttakandi ráði við allar þrautirnar og verður boðið upp á aðra valkosti fyrir þær sem eru merktar með (*).
Keppnin er haldin að danskri fyrirmynd og áhugasamir geta kynnt sér gögn þaðan á síðunni http://www.havkajakdm.dk.
Einnig má sjá myndbönd á Youtube http://www.youtube.com/watch?v=HX9Qe2wHu8M og http://www.youtube.com/watch?v=VCgxKiHeBNA
Keppnin gefur ekki stig í keppni um Íslandameistaratitil á sjókayak.
Keppnisfyrirkomulag getur tekið breytingum og nánari upplýsingar verða birtar þegar nær dregur keppni.